ភ្នំពេញ៖ នាយករដ្ឋមន្ត្រី សម្ដេចតេជោ ហ៊ុន សែន ថាសម្ដេចមិនដឹងថាបងស្រីទី១របស់សម្ដេចកិត្តិព្រឹទ្ធបណ្ឌិតអាចចូលរួមបុណ្យសពប្អូនស្រីពៅបានឬទេខណៈពេលនេះគាត់ក៏កំពុងសម្រាកព្យាបាលជំងឺដែរនោះ។

សម្ដេចតេជោ ហ៊ុន សែន បានបង្ហោះលើហ្វេសបុកផេករបស់សម្ដេចនៅរសៀលថ្ងៃទី៤ ខែកុម្ភៈនេះដោយបានប្រៀបធៀបស្ថានភាពរបស់សម្ដេចកិត្តិព្រឹទ្ធបណ្ឌិតនៅពេលនេះទៅនឹងស្ថានភាពដែលសម្ដេចបាត់បងសម្ដេចទេពញាណ ហ៊ុន ណេង ដូចគ្នា។

សម្ដេចតេជោសរសេរថា៖ «ឆ្នាំមុនបងប្រុសទីពីរមរណភាពក្នុងពេលបងប្រុសទីមួយកំពុងឈឺធ្ងន់មិនអាចផ្តល់ដំណឹងឲ្យគាត់ដឹងបាន។ ឆ្នាំនេះប្អូនស្រីពៅចែកឋានក្នុងពេលបងស្រីទីមួយកំពុងព្យាបាលជម្ងឺមិនដឹងថាតើគាត់អាចចូលរួមបុណ្យសពប្អូនស្រីពៅបានឬអត់?»។

គួរឱ្យដឹងផងដែរថា លោកស្រី ប៊ុន សុថា គឺជាប្អូនស្រីពៅរបស់ សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន បានទទួលមរណភាពនៅថ្ងៃទី៣ ខែកុម្ភៈ ឆ្នាំ២០២៣ វេលាម៉ោង ៦និង១៣នាទី ក្នុងជន្មាយុ ៦៧ឆ្នាំ ដោយរោគាពាធ។

សពត្រូវបានតម្កល់ទុកធ្វើបុណ្យតាមប្រពៃណី នៅផ្ទះលេខ៦៦ ផ្លូវលេខ៥២៨ កែងផ្លូវ២៨៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ នឹងដង្ហែរទៅបញ្ចុះនៅវត្តបុទុមវតី នៅថ្ងៃទី៧ ខែកុម្ភៈ ឆ្នាំ២០២៣។

សម្ដេចតេជោ ហ៊ុន សែន បានបង្ហោះលើហ្វេសបុកផេករបស់សម្ដេចនៅល្ងាចដែលនោះដោយបានលើកឡើងពី «ក្រិត្យក្រមធម្មជាតិឆ្នាំមុនបាត់បង់បងប្រុស ឆ្នាំនេះបាត់បង់ប្អូនថ្លៃស្រី»៕